O Concello do Carballiño presentou esta mañá a II Carreira do Pulpo, que se celebrará o domingo 12 de xullo e que volverá converter a vila nun punto de encontro para corredores populares, deportistas e familias.
Na presentación participaron o alcalde en funcións, Pepe Castro, e a responsable da organización deportiva, Rebeca Amil, que destacaron o crecemento desta iniciativa e a súa vocación de consolidarse dentro do calendario deportivo estival.
Pepe Castro explicou que esta segunda edición busca ampliar a participación e ofrecer unha proba aberta a persoas de todas as idades e niveis deportivos, ao tempo que permite descubrir diferentes espazos do municipio.
A carreira contará con dúas distancias para adultos, de 5 e 10 quilómetros, con saída ás 10.00 horas, e cunha proba infantil de 2 quilómetros, prevista para as 11.30 horas.
As inscricións son gratuítas e poden formalizarse a través da plataforma Sportmaniacs e da aplicación Saudeter Live.
Pola súa banda, Rebeca Amil destacou que o percorrido combina zonas de sombra e distintos desniveis, ofrecendo un trazado atractivo tanto para corredores habituais como para participantes populares.
A organización anima especialmente ás familias a participar na carreira infantil para converter a mañá do domingo nunha auténtica festa do deporte.
Como complemento á proba, todos os participantes terán entrada gratuíta á Piscina Municipal, onde a partir das 12.00 horas se desenvolverán sesións de zumba e ioga, favorecendo a recuperación tras o esforzo e promovendo hábitos de vida saudables.
Castro agradeceu finalmente a colaboración da Deputación de Ourense, das empresas patrocinadoras e do tecido deportivo local, cuxo apoio resulta fundamental para facer posible esta segunda edición da Carreira do Pulpo.
