Máis de 400 mulleres participaron nos obradoiros de igualdade “Xuntas medramos” celebrados o pasado ano. Máis de 60 delas recibiron o documento que acredita a finalización con éxito dos obradoiros da man do alcalde de Ferrol, José Manuel Rey Varela. No acto estivo acompañado pola concelleira de Muller e Igualdade, Elvira Miramontes, e membros da corporación municipal. As participantes que non estiveron presentes no acto poden recoller o diploma na Casa da Muller.
Os talleres versaron sobre informática, empoderamento laboral, sonoras e visibles, recuncho de crear, emocionarte, memoria, activadas, ioga, relaxing e autodefensa. Impartíronse na Casa da Muller, no local das Mulleres de Caranza, nos locais veciñais Ultramar, San Román de Doniños, Valón, Covas, Esmelle, nos centros cívicos de San Pablo e de Canido, na biblioteca municipal da praza de España e no pavillón de Esteiro, co obxectivo de achegar estas actividades formativas ao maior número posible de veciñas.
O rexedor ferrolán destacou o éxito de participación nesta iniciativa, que “outorga ás participantes ferramentas que favorecen a autonomía e as relacións interpersoais e comunitarias, o que resulta vital para seguir aprendendo”. Así mesmo, agradeceu a participación das alumnas e felicitounas por completar os obradoiros.
Pola súa banda, a concelleira adiantou que “Xuntas medramos” continuará no 2025 e animou ás presentes a inscribirse novamente. Avanzou que haberá actividades novas, como pilates ou bailoterapia, tras escoitar as peticións das usuarias. O prazo de inscrición será do 20 ao 3 de febreiro.
