A Xunta de Goberno local de Ferrol aprobou a modificación do Proxecto básico e de execución das obras de reurbanización do final da rúa Doctor Fleming e comunicación peonil entre a rúa Alonso López e Ignacio Martell, no barrio de Canido. O alcalde ferrolán, José Manuel Rey Varela, explicou que, antes de aprobar o proxecto, presentouse á asociación veciñal de Canido para que puideran realizar achegas.
Trátase da remodelación e reurbanización completa da secuencia urbana formada polo final da rúa Doctor Fleming e a súa conexión peonil coas rúas Alonso López e Ignacio Martell. “Imos recuperar o espazo público, destinado ao peón, facilitando así a mobilidade do barrio, a accesibilidade e creando un espazo de estancia para os veciños”, avanzou o rexedor. Así mesmo, apuntou que “é de vital importancia e de interese para o Concello de Ferrol mellorar a seguridade viaria tanto para a circulación de vehículos como das persoas mediante obras de urbanización nesta vía”.
DESCRICIÓN DAS OBRAS DE REURBANIZACIÓN
Así, este espazo de confluencia dos diferentes percorridos nun plano aberto, seguindo a pendente natural e suave do terreo, facilitará a comunicación dos diversos espazos que concorren nel. Á súa vez, crearase unha superficie amable, que posibilitará tanto a estancia como o paseo.
Permitirase unha circulación desde todos os puntos que alí acometen e en todas direccións, por iso o proxecto recolle a instalación de pavimento de formigón lavado similar ao existente nas rúas Alegre e Alonso López, xunto con despeces de zonas verdes con árbores. As árbores elixidas, Prunus serrulata kazan, son de tamaño adecuado para a súa plantación e serán de porte medio, para que non impidan a visión do espacio continuo, xerando espazos de sol e sombra.
No parterre, situado arredor do muro de contención existente, colocarase Hidrogenea paniculata de cores variadas, para consolidar o noiro e xerar unha zona verde de transición. Tamén contémplase a dotación de mobiliario urbano, situándoo onde sexa necesario e poida resultar útil. Con respecto á iluminación, o modelo elixido é similar ao existente no barrio. Son lámpadas con tecnoloxía led que estarán conectadas a un sistema de control para poder facer acendidos, agrupacións e a regulación dunha maneira individual ou grupal.
Ademais, na rúa Doctor Fleming habilitaranse 15 prazas de estacionamento e na rúa Ignacio Martell, outras 13. Asemade, o Goberno local estudará máis vías para poder habilitar prazas de aparcamento no barrio. No tocante ao orzamento, este proxecto de reurbanización ten un custe de 319.331 euros.
