Ternera Gallega e Vaca Galega-Boi Galego, Indicacións Xeográficas Protexidas (IXP), presentaron na sede do Consello Regulador en Santiago, a terceira tempada da súa Escola de Cociña que se emite a través das súas redes sociais e inclúe novos contidos gastronómicos e propostas adaptadas á cociña actual, consellos prácticos, técnicas de corte e preparación e receitas innovadoras que buscan dar resposta ás necesidades dos consumidores e dos profesionais, sempre tendo como produtos estrela as carnes das dúas IXP.
Ternera Gallega esta terceira tempada da Escola de Cociña na súa canle de Youtube, na que a IXP divulga desde hai anos as mellores receitas coas que os usuarios poden coñecer a versatilidade da carne certificada e os consellos prácticos que resaltan as cualidades diferenciais do produto: moleza, zumarencia e sabor.
Nesta nova campaña, a Denominación ofrecerá contidos adaptados ás tendencias actuais: desde o batch cooking (elaboracións para toda a semana) e as preparacións para frixideira de aire ata outras en voga, como o ramen ou o pastrami. Tamén vai presentar pratos rápidos e sinxelos para o día a día, con ideas para a prancha, e unha revisión das receitas tradicionais, como a boloñesa ou o rosbif.
Os usuarios poderán coñecer tamén, a través da Escola de Cociña, todas as pezas do vacún e os seus usos culinarios, achegándose aos cortes menos coñecidos —a tapa da pa, a man de diante ou o vacío e as súas diferentes partes— pero con posibilidades gastronómicas á altura dos máis afamados. Os novos vídeos de Ternera Gallega tamén van resolver as dúbidas frecuentes que todos temos á hora de preparar a carne de vacún, especialmente na prancha ou na grella, e explicarán conceptos técnicos que inciden na súa moleza e zumarencia: a maduración, o temperado ou o corte a contrafibra.
Para esta edición, Ternera Gallega contou con tres chefs de referencia e colaboradores habituais da IXP: un dos maiores expertos en carne de vacún e membro do grupo Nove, Javier Rodríguez Ponte Taky, (cátering Boketé); un gran coñecedor das Denominacións de calidade, con diferentes recoñecementos polo seu traballo como embaixador das IXP e DOP galegas, Xosé Manuel Mallón (chef de eventos e formacións), e a premiada como Mellor Cociñeira Galega do 2024, a televisiva Begoña Vázquez (restaurante Regueiro da Cova, en Castrelo do Val, e programa A Voltas co prato, da TVG).
O Consello Regulador tamén presentou os novos contidos audiovisuais da IXP Vaca Galega-Boi Galego desenvolvidos para as redes sociais, co obxectivo de divulgar e poñer en valor as cualidades propias do vacún maior certificado e achegalo ás nosas cociñas particulares; máis aló do seu uso habitual na restauración, na que xa conta cun prestixio amplamente recoñecido.
Baixo a dirección do actual presidente do Grupo Nove e cociñeiro experto na carne de vacún maior, Héctor López (Restaurante España, Lugo), os novos vídeos da IXP amosarán pezas singulares, como o denver cut ou a bavette, e afondarán no coñecemento dos cortes míticos deste tipo de carne: o lombo alto, o lombo baixo e o chuletón.
Vaca Galega-Boi Galego, carnes de vacún maior certificadas
En canto ás receitas, Héctor López ensinaranos a preparar os grandes clásicos pero tamén outros pratos da cociña internacional: desde o seu premiado steak tartar (Mellor Steak Tartar do Forum gastronómico de Barcelona 2023) ou o guiso perfecto ata un katsu sando xaponés.
Ademais, abordará aspectos de especial consideración no vacún maior co fin de romper mitos e crear realidades, explicando a maduración ou a infiltración da graxa; e incidirá nas etiquetas que acompañan as carnes certificadas de Vaca Galega e Boi Galego para que os consumidores as recoñezan e saiban distinguilas doutras carnes sen orixe e calidade garantida.
Nas receitas de ambas IXP, tanto de Ternera Gallega como de Vaca Galega-Boi Galego, as carnes acompañaranse sempre doutros produtos autonómicos con selo de calidade, como os queixos con DOP Arzúa-Ulloa, Tetilla, O Cebreiro e San Simón da Costa, as IXP Pataca de Galicia e Fabas de Lourenzá ou as DO vitivinícolas, entre outras.
O acto de estrea celebrado este mércores rematou cunha degustación de diferentes elaboracións dos catro chefs colaboradores, que ofreceron unha mostra das propostas culinarias recollidas nos vídeos presentados. Con esta nova liña de contidos, o Consello Regulador continúa avanzando no seu labor de promoción e divulgación mediante formatos actuais, achegando as carnes certificadas aos consumidores, aos promotores gastronómicos e aos profesionais cárnicos, da distribución e da canle Horeca.
Á presentación da terceira tempada da Escola de Cociña e das novas propostas gastronómicas das dúas IXP asistiron, a conselleira do Medio Rural, María José Gómez; o director xeral de Gandaría, Agricultura e Industrias Agroalimentarias, José Balseiros; o director de AGACAL, Martín Alamparte; representantes das dúas Indicacións Xeográficas Protexidas, do sector da carne e da cociña, creadores de contido, prensa especializada e os chefs protagonistas.
