O pleno da Mancomunidade de Concellos de Ferrol aprobou a nova licitación do expediente de contratación administrativa e o prego actualizado de cláusulas administrativas e de prescricións técnicas que rexerán o servizo de xestión de residuos voluminosos.
Dito prego substitúe e actualiza o anterior, redactado en setembro do 2023 e introduce no expediente un incremento do beneficio industrial que forma parte do orzamento base de licitación, elevándoo do 6% ao 9%.
O prazo de execución do contrato dará comezo desde o día seguinte ao da sinatura do correspondente contrato administrativo e terá unha unha duración de tres anos, con posibilidade de dous anos de prórroga.
O tipo de licitación contempla un prezo de recepción e pretratamento de 96,34 euros por tonelada e un prezo de disposición final, incluído transporte, de 96,73 euros por tonelada. Destinarase un total de 978.518,28 euros para os tres anos de duración inicial do contrato, o que supón 326.172,76 euros por ano. O investimento total ascende a preto de 1,9 millóns de euros incluíndo a posible prórroga e o imposto ao vertido.
O servizo a contratar contempla a recepción dos residuos voluminosos entregados polos distintos concellos da Mancomunidade, a pesada das entregas e o seu rexistro, o almacenamento temporal dos residuos e a súa clasificación, xestión e tratamento, entre outras tarefas.
Os residuos incluídos nesta xestión son mobles, electrodomésticos e equipos electrónicos, entre outros, non incluíndose residuos radioactivos, industriais ou sanitarios. En calquera caso, a empresa aceptará a totalidade dos residuos entregados polos concellos da Mancomunidade procedentes das recollidas municipais de aveños.
