O Concello de Ferrol traballa na dotación de medios humanos e recursos materiais para que a Policía Local poida mellorar a prestación do seu servizo público.
A Xunta de Goberno local aprobou a contratación do servizo de recollida, transporte, recepción, análise e entrega dos resultados de mostras de saliva para a determinación cuantitativa de drogas non organismo das persoas usuarias da vía no Concello de Ferrol. A posta deste servizo integral permitirá á Policía Local avanzar de maneira decisiva na loita contra o consumo de drogas durante a condución, unha das principais ameazas para a seguridade viaria.
Este sistema posibilitará a determinación cuantitativa de substancias estupefacientes no organismo das persoas usuarias da vía, contribuíndo así a garantir unha condución máis segura para o conxunto da cidadanía.
Na actualidade, a Policía Local non dispón dos medios materiais nin persoais necesarios para desenvolver estas funcións, polo que a contratación deste servizo resulta esencial para asegurar unha resposta eficaz e rigorosa ante este tipo de condutas.
A normativa vixente, recollida no artigo 14.1 do Real Decreto Lexislativo 6/2015, do 30 de outubro, polo que se aproba o texto refundido da Lei sobre Tráfico, Circulación de Vehículos de Motor e Seguridade Viaria, establece que non poden circular polas vías os condutores con presenza de drogas no organismo. Así mesmo, o punto 2 do mesmo artigo determina a obrigatoriedade de someterse ás probas de detección de alcohol e drogas cando sexa requirido polos axentes da autoridade.
O servizo contratado incluirá a subministración de dispositivos de recollida de fluídos orais, etiquetas e sistemas de precintado que garantan a integridade das mostras. A empresa adxudicataria deberá recoller as mostras na Xefatura da Policía Local nun prazo máximo de 24 horas desde o aviso, asegurando en todo momento a cadea de custodia e as condicións de conservación necesarias.
As análises abranguerán substancias como cocaína, cannabis, anfetaminas e derivados, opiáceos, benzodiazepinas, metadona, zolpidem e ketamina. O prego do contrato recolle, tamén, que os informes cos resultados serán emitidos nun prazo máximo de sete días hábiles desde a remisión das mostras. O orzamento do contrato ascende a 26.136 euros.
Con esta iniciativa, o Concello de Ferrol da un paso firme na prevención de accidentes e na protección da seguridade viaria, reforzando os mecanismos de control e garantindo o cumprimento da legalidade en beneficio de toda a sociedade.
