A Xunta de Galicia destinou 848.728 euros á mellora do firme da estrada autonómica AC-102 ao seu paso polos Concellos de Cedeira e Cerdido. Co gallo do fin desta obra, a delegada territorial da Xunta, Martina Aneiros, achegouse ao municipio de Cerdido para supervisar o resultado da intervención. Na visita estivo acompañada polo alcalde da localidade, Alberto Rey.
Os traballos foron acometidos pola Consellería de Vivenda e Planificación de Infraestruturas. As obras consistiron na regularización das zonas máis deterioradas, fundamentalmente rodeiras, fresado das zonas de firme con danos estruturais e reposición. Nalgúns tramos, procedeuse á eliminación parcial e reposición do firme, seguida dun recrecemento. A finalidade era mellorar as condicións de circulación e a seguridade viaria nesta estrada que pertence á rede complementaria de estradas convencionais da Rede de estradas da Xunta de Galicia. As actuacións completáronse co pintado da sinalización horizontal.
A delegada territorial lembrou que esta é unha das catro estradas autonómicas da área da Delegación que a Administración autonómica acondicionou nos últimos meses, xunto á AC-862, AC-100 e AC-151. O investimento conxunto ascendeu a preto de 3,2 millóns de euros.
Aneiros recordou o compromiso do Goberno galego por “seguir mellorando a rede de estradas autonómica para reforzar a seguridade viaria e a comodidade dos usuarios, así como para impulsar unha mobilidade máis sustentable no territorio”.
