A delegada territorial da Xunta en Ferrol, Martina Aneiros, visitou dous centros educativos de Pontedeume nos que o Goberno galego investiu 118.000 euros en obras de acondicionamento. Trátase do CEIP Couceiro Freijomil e o IES Breamo. A delegada estivo acompañada do alcalde de Pontedeume, Bernardo Fernández, e do director territorial da Consellería de Educación, Ciencia, Universidades e FP, Indalecio Cabana.
No caso do CEIP Couceiro Freijomil, a intervención consistiu na substitución da cuberta da zona de Educación Infantil, cun investimento de 47.170 euros. Os traballos executáronse durante o verán para non interferir nas clases.
No IES Breamo remataron recentemente as obras para o cambio das ventás da fachada sur do centro e a impermeabilización da zona sobre o cadro eléctrico, cuxo importe ascendeu a 46.344 euros. Así mesmo, iniciáronse os traballos de pavimentación con formigón pulido do acceso ao centro pola fachada sur. Con esta intervención preténdese mellorar a accesibilidade eliminando os desniveis existentes para facilitar o acceso ás persoas con mobilidade reducida. Neste caso o importe dos traballos ascenden 24.600 euros.
As intervencións en ambos centros están incluídas dentro do Plan de Nova Arquitectura Pedagóxica, a folla de ruta do Goberno galego para a modernización dos centros educativos. No caso de Ferrolterra, recolle actuacións por valor de 14,3 millóns de euros. Ademais destas pequenas e medianas intervencións, o Plan de Nova Arquitectura Pedagóxica recolle actuacións en marcha como a ampliación do CPI As Mirandas, que conta cun investimento de 3,1 millóns de euros; ou comprometidas, como a rehabilitación integral do CIFP Leixa, valorada en 2 millóns de euros.
A delegada territorial lembrou o compromiso do Goberno galego cunha educación pública de calidade, “que pasa tamén por ofrecer uns centros educativos que ofrezan espazos confortables, seguros e accesibles nos que os escolares poidan desenvolver a súa aprendizaxe”, indicou.
