Co gallo de realizar seguimento das obras de humanización da avenida das Pías FE-14, celebrouse unha reunión na oficina da rúa Venezuela. A ela acudiron o alcalde ferrolán, José Manuel Rey Varela; a delegada da Xunta en Ferrol, Martina Aneiros; a subdelegada do Goberno na Coruña, María Rivas; e técnicos do Ministerio de Transportes e Mobilidade Sostible, da Demarcación de Estradas do Estado en Galicia.
Durante a mesma, o rexedor reiterou cuestións que preocupan aos veciños e veciñas como a eliminación de 14 prazas de estacionamento en Caranza. Desde o principio, o Concello defendeu que a ampliación de zonas verdes é imprescindible, pero ten que ser compatible con non perder aparcadoiros e incluso gañar prazas de estacionamento. Na reunión informouse de que a demanda do Goberno local e da veciñanza será aplicada, mantendo as prazas de aparcamento existentes e aumentándoas en tres, ata un total de 17 prazas.
AXUSTES TEMPORAIS DO TRÁFICO NAS PÍAS
Por outra banda, segundo a información trasladada polos técnicos do Ministerio, o vindeiro cambio no tráfico rodado producirase o luns 2 de decembro, cando se procederá á pavimentación da nova glorieta da rúa Nova de Caranza e conexións coas rúas adxacentes, Isto obrigará a pechar o actual by-pass rodado. O cruce peonil da FE-14 será reposto nas inmediacións da nova glorieta en execución. Esta modificación manterase ata o 20 de decembro. Neste sentido, o rexedor trasladou a súa preocupación no que respecta ao cumprimento dos prazos para que o barrio de Ultramar non quede sitiado por segundo ano consecutivo no Nadal.
Por último, Rey Varela agradeceu a predisposición por parte da subdelegada e Demarcación de Estradas así como das entidades veciñais.
