A Xunta de Galicia, con motivo da problemática xerada polo avance da avespa asiática na nosa comunidade autónoma, puxo en marcha un Programa de vixilancia e control fronte a esta especie no ano 2014, co fin de minimizar a súa incidencia sobre as producións apícolas e sobre a seguridade cidadá. O Concello de Ferrol leva adheríndose a este programa desde o seu inicio, e no 2024 foi o primeiro ano no que todos os concellos da comunidade autónoma se adheriron.
O programa inclúe fundamentalmente actividades relacionadas coa detección precoz de niños mediante avisos a través do 012 e 112 e o control e eliminación/neutralización de niños sempre que sexa posible. Ademais, de potenciar o portal de internet https://www.eidolocal.gal/portada impulsando a súa capacidade como canle de comunicación permanente coas entidades locais de Galicia para dar información actualizada sobre as actuacións en materia de avespa velutina.
En febreiro de 2020 a Xunta de Galicia e a Fegamp, co obxecto de redobrar esforzos e centralizar recursos na loita contra o avance desta especie invasora, asinaron o convenio entre a entón denominada Vicepresidencia e Consellería de Presidencia, Administracións Públicas e Xustiza e a Fegamp para establecer a coordinación de actuacións no desenvolvemento do Programa Galego de Vixilancia e Control fronte á avespa asiática. Isto implicou para a administración autonómica a asunción da coordinación de actuacións para a retirada e destrución dos niños de velutina no territorio galego coa colaboración cos concellos adheridos, ofrecendo unha actuación profesional e eficaz.
O presente convenio estenderá a súa vixencia desde a data da súa sinatura ata o 30 de decembro de 2026.
