O Concello de Ortigueira vén de comezar as obras de mantemento e acondicionamento do aparcadoiro do edificio xudicial. A intervención iniciada esta semana supón un investimento de 48.000 euros. Trátase dunha actuación realizada pola Consellería de Presidencia, Xustiza e Deportes da Xunta de Galicia.
As tarefas céntranse na reparación e pintado dos accesos, o arranxo do pavimento de adoquín de granito e o peche perimetral da parcela.
A execución das obras durante o mes de agosto responde á planificación da administración autonómica para aproveitar o período estival. Así, coa menor actividade nos xulgados, non se entorpece a atención á cidadanía.
Trátase da segunda intervención no xulgado de Ortigueira nos últimos anos. Neste sentido, no 2022 a Xunta investiu 38.000 euros para subsanar problemas de filtracións nas cubertas do edificio.
O alcalde ortigueirés, Valentín Calvín, celebrou que o ente autonómico “teña en conta as necesidades de Ortigueira e se fagan investimentos no noso municipio”. Así pois, agradeceu á Consellería que “manteña os xulgados nun estado óptimo para dar o mellor servizo posible ás cidadás e cidadáns”.
