Un grupo de persoas irrumpiron este domingo nas inmediacións da vivenda persoal da conselleira de Medio Ambiente e Cambio Climático, Ánxeles Vázquez, na localidade de Melide.
Entre as pancartas había unha ameaza explícita: “Ánxeles, veciña, ti tamén tes familia. Non descansaremos”, xunto co logotipo de “Altri Non”.
Tal e como explican os populares, a persoa que a portaba, X.R.L., é coñecida pola súa estreita vinculación co BNG. “Trátase dun capítulo máis da campaña de intimidación e a coacción do nacionalismo e a súa órbita, da que xa foron vítimas os empregados públicos e que agora chega tamén á conselleira”, apuntan. Membros das Forzas e Corpos de Seguridade do Estado xa se puxeron en contacto con Ánxeles Vázquez para ofrecerlle o seu apoio.
Engaden os populares que “este tipo de comportamentos, que afectan directamente a menores de idade e persoas maiores que conviven coa conselleira, non teñen cabida en democracia. Esiximos do BNG unha condena firme e que solicite aos seus militantes que se absteñan de acosar aos membros do Goberno galego e da Administración autonómica. Pese á coacción, ás ameazas cada vez máis explícitas e aos intentos de intimidación, a Xunta seguirá cumprindo a Lei”.
“SEGUIREMOS DEFENDENDO A LEGALIDADE EN TODO TIPO DE ACTUACIÓNS” DI CALVO
Diego Calvo, conselleiro de Presidencia, Xustiza e Deporte, lanzou en rolda de prensa unha mensaxe de “solidariedade” a súa compañeira de goberno Ángeles Vázquez. Dixo que “ xa non se trata de amedrentar aos funcionarios como vimos nos últimos meses, senon que agora, trátatase de coaccionar e amedrentar aos membros do Consello da Xunta” engadiu que “ seguiremos defendendo a legalidade en todo tipo de actuacións, sobre todo nos expedientes que quedan pendentes”.
