O deseñador galego Roberto Verino recibiu un dos galardóns mais importantes da sua carreira ata o momento. O creador de Verín for recoñecido coa máxima distinción da Academia da Moda Española, que lle outorgou o seu Premio de Honra na segunda edición dos Premios FAME. Este galardón destaca unha traxectoria profesional exemplar marcada polo compromiso ético, a defensa da moda con valores e a conexión emocional coas persoas.
Con máis de corenta anos de carreira á fronte da súa firma, o deseñador galego consolidouse como unha figura clave da moda española e un referente do deseño elegante e atemporal. Fundador da antiga Pasarela Cibeles e membro impulsor da Asociación de Creadores de Moda de España, a súa influencia foi fundamental tanto no ámbito creativo como institucional.
O deseñador expresou a súa emoción e gratitude por este recoñecemento, que sente tamén como unha homenaxe aos oficios e ás persoas que compartiron con el unha maneira de entender a moda feita con alma. O coñecido “traxe Verino”, símbolo do empoderamento feminino nos anos 80, exemplifica o seu compromiso cunha muller forte, libre e valente.
Este novo galardón súmase a outros recoñecementos como a Aguja de Oro, a Medalla de Ouro ao Mérito nas Belas Artes ou o seu ingreso na Real Academia Galega de Belas Artes. Para Verino, este premio ten un valor especial por vir de quen forma parte activa da industria que leva décadas defendendo.