O Concello de San Sadurniño recibirá algo máis de 86.000 euros do Plan Camiña Rural, antigo Plan de camiños da AGADER. Este importe deberá destinarse a financiar a reparación de camiños que dean acceso a terreos ou explotacións agropecuarias.
Neste sentido, o Goberno local encargou un proxecto cifrado en 104.000 euros. Este inclúe a mellora con asfalto dunha pista na Pena, en Santa Mariña do Monte; e o aglomerado do eixo As Ramisqueiras-As Leiras-Vilela, no Camiño Arriba. Esta última vía municipal, de 1,2 quilómetros de trazado, incluíuse como previsión no Plan Complementario do POS+ provincial. Agora, adiantarase a súa execución a través deste programa autonómico, cofinanciado por Europa e o Estado.
DESCRICIÓN DO PROXECTO NAS PISTAS
As pistas que se van reparar cobren case dous quilómetros da rede viaria de San Sadurniño. A máis curta encóntrase no lugar da Pena, en Santa Mariña do Monte. Trátase dun camiño asfaltado de 505 metros de longo que conecta a estrada provincial DP-7603 co lugar de Vilachá, pasando por detrás do mesón Os Cazadores. No proxecto tamén se incluíu o camiño circular que dá servizo a dúas vivendas algo máis afastadas da pista principal, sumándolle á obra final outros 240 metros.
Dado que non é unha vía principal que soporte un tráfico intenso, os traballos correctivos consistirán nunha limpeza do firme e das cunetas, seguida do tapado de fochancas e a extensión dunha nova capa de rodaxe con regas asfálticas e saburra.
A segunda pista acollida ao Plan Camiña Rural une os lugares das Ramisqueiras, As Leiras e Vilela, no Camiño Arriba. Neste caso, tamén se comezará limpeza xeral da vía e das súas beiras para deixala nas mellores condicións posibles. Posteriormente, executarase un pavimento aglomerado de 5 centímetros de grosor e un ancho medio de 4,75 m, máis uniforme que o actual.
PROXECTO PENDENTE DE VALIDACIÓN
O Concello de San Sadurniño xa lle remitiu á AGADER a documentación relativa ao proxecto. Unha vez validada pola Xunta, someterase a licitación pública. Así, espérase que a obra quede lista xa nesta anualidade, aínda que o Plan Camiña Rural dea de marxe para executala ata o remate de 2026.
O contrato licitarase cun orzamento de 104.333,09 euros, impostos incluídos. O consistorio cubrirá este investimento cos 86.229 euros da axuda cofinanciada por Medio Rural, o Ministerio de Agricultura e os fondos europeos do FEADER. En canto aos custes do IVE, serán asumidos con fondos municipais.
O Plan Camiña Rural, antes chamado Plan de Camiños Municipais, é un programa dirixido exclusivamente aos concellos para que estes leven a cabo actuacións de ampliación, mellora ou mantemento de camiños de titularidade municipal que dean acceso en calquera punto do seu trazado a, polo menos, dúas parcelas agrícolas.
