O Ministerio de Transportes e Mobilidade Sostible está a executar a retirada do entullo acumulado na explanada situada baixo o viaduto da A-52 en Barbadás. Estes terreos, de titularidade estatal, foron obxecto de diversas reclamacións por parte do Goberno local, co obxectivo de lograr a súa limpeza e recuperación. Tras un longo proceso administrativo, numerosas reunións e xestións levadas a cabo polo Concello de Barbadás, xa se iniciou a retirada do cascallo.
Os concelleiros Daniel Rey e Victoria Morenza, cuxas concellarías traballaron de maneira coordinada para dar unha solución efectiva a esta problemática, expresaron a súa satisfacción ante o inicio dos traballos. Non obstante, lamentan o “considerable atraso” na súa execución.
Neste sentido, a insistencia e reiteradas xestións municipais lograron que os organismos competentes asuman as súas obrigas con respecto aos terreos. Os pasos posteriores e a futura xestión deste espazo quedan baixo a responsabilidade do Ministerio de Transportes e Mobilidade Sostible, titular do mesmo.
