A programación de Primavera de Cultura se estenderá ata finais do mes de maio, e este venres chega ao local social de San Martiño de Calvos cunha sesión de contos a cargo de María da Pontragha e unha chocolatada
O programa Primavera de Cultura, posto en marcha polo Concello de Arzúa ofrecendo propostas culturais para todos os públicos ata finais de maio para o fomento da lectura e das Letras Galegas, terá continuidade este venres 9 de maio cunha sesión de contos, que forma parte da iniciativa municipal As parroquias contan.
Así, María da Pontragha será a encargada de levar os contos ao local social de San Martiño de Calvos, nunha sesión que comezará ás 20:30 horas, con entrada libre e de balde, e tras a cal se ofrecerá a todos os asistentes unha chocolatada, explican dende o departamento de Cultura do Concello de Arzúa nun comunicado.
O concelleiro de Cultura de Arzúa, José Luís García, lembra que continúan abertas dúas exposicións que se poden visitar. A Capela da Madanela acolle a mostra do XVIII Premio Luís Ksado de Creación Fotográfica da Deputación da Coruña ata o 20 de maio e que está aberta de martes a sábados en horario de 18:30 a 20:30 horas. Por outra banda, continúa a exposición de fotografía de Bruno Lernout ubicada agora no primeiro andar da Casa de Correos aberta todos os días de 17:00 a 20:00 horas.
José Luís García anima “a todas as persoas a participar nestas iniciativas, tanto na vila como nas parroquias, como síntoma da boa saúde que ten a programación cultural no noso concello”, cunha ampla programación, para todos os públicos e da que se poderá gozar ata o remate do mes de maio.
