O xurado do premio da Deputación de Ourense destacou da obra do ferrolán “a súa orixinalidade cunha temática rompedora, doada de ler e que engancha moito”
O ferrolán Antonio Yáñez Casal vén de gañar, coa súa obra Azul cobalto, a XX edición do Premio Pura e Dora Vázquez de Narración. O xurado do certame, que organiza a Deputación Provincial de Ourense, anunciou o seu fallo o 12 de setembro e destacou da obra gañadora, dirixida a un público xuvenil, “a súa orixinalidade e cunha temática rompedora, doada de ler que engancha moito, e cunha linguaxe e un estilo moi coidados”. Tamén incidiu o xurado “nos valores dos que fala como o traballo en equipo a perseveranza e a importancia da lectura para chegar a comprender as cousas”.
O escritor ferrolán que presentou a súa obra ao certame co pseudónimo Maceteum, xa fora gañador na XIV edición do Premio de Narración Pura e Dora Vázquez no ano 2016 co seu traballo Do meu nome e outras trapalladas. Antonio Yáñez Casal naceu en Ferrol no ano 1959 e ten publicado máis dunha decena de obras coas que foi gañador dos premios Meiga Moira (2006) por Lóbez, Raíña Lupa (2006) por Viaxe a Libunca, Abrente (2007) por Octavius Augustus; Frei Martín Sarmiento, 2ª Categoría, por Xoa (2012), premio Barco de Vapor (2013) coa súa obra O detective de Nullarbor, ademáis de ser finalista en outros tantos certames.
O xurado, que destacou tamén a calidade de todas as obras que se presentaron a esta nova edición do premio, estivo composto por un representante de cada un dos grupos políticos da Deputación de Ourense.
Agora, ponse en marcha, segundo informan dende a Deputación, a vixésima edición do Premio Pura e Dora Vázquez de Ilustración, no que o artista galardoado acompañará cos seus traballos ao texto Azul cobalto, de Antonio Yáñez, premiado na modalidade de narración. Os ilustradores de calquera nacionalidade interesados en participar poden solicitar o texto gañador en publicacions@depourense.es, xa que os traballos teñen que ilustrar a obra gañadora na modalidade de narrativa. As bases do certame poden consultarse no BOP Nº 118, do mércores 19 de xuño de 2024 (Pax. 6).
