O Festival de Habaneras do Carballiño, que se desenvolverá de balde este sábado no Auditorio Manuel María, tamén homenaxeará ao músico e docente ourensán Carlos Núñez
O Festival de Habaneras do Carballiño, que organizan colaborativamente o Concello e o Orfeón da localidade ourensá, desenvolverase este sábado 26 de xullo no Auditorio Manuel María. O festival, que suma a súa 31ª edición, é unha das iniciativas musicais máis queridas entre a veciñanza e os visitantes durante a época estival.
O Festival de Habaneras contará coas actuacions de catro grandes agrupacións: Coral Souto da Igrexa de Meirás (Sada), Coral Polifónica A Cañiza, Rondalla Alfaia de Cenlle e o propio Orfeón do Carballiño. O repertorio inclúe cancións habaneras e latinoamericanas, que lembran a música que trouxeron os moitos veciños da comarca que cruzaron o charco en busca dunha vida mellor.
En palabras de Diego Fernández, concelleiro de Cultura, este Festival de Habaneras “homenaxea aos emigrantes e a cultura que foi e volveu, e tamén nos permite escoitar músicas doutros lugares sen movernos do Carballiño”. O edil puxo en valor, durante a presentación do Festival, o traballo e esforzo levado a cabo polo Orfeón, que cada ano convida ás mellores corais.
Pola súa parte, Rogelio Rodríguez, presidente do Orfeón do Carballiño, agradeceu a boa resposta da poboación, que cada ano “enche o auditorio”. Nesta edición do Festival de Habaneras, a organización homenaxeará ao músico e docente ourensán Carlos Núñez. Christian Casas, director do Orfeón, puxo en valor a traxectoria profesional de Núñez, así como a súa faceta de impulsor de eventos musicais como o Ourencanto.
Facemos un chamamento aos veciños para que vaian con tempo para poder coller sitio e desfrutar dunha xornada que xa forma parte da programación da Festa do Pulpo” (Diego Fernández, concelleiro de Cultura do Carballiño)
Christian Casas asegurou tamén que as cancións interpretadas o sábado serán “fermosas” e adiantou que o Orfeón do Carballiño e a Rondalla Alfaia presentarán unha obra “moi especial, bonita e pegadiza”. A entrada neste Festival de Habaneiras é de balde, polo que as entradas se adxudicarán en orde de chegada ao Auditorio.
