A mostra de Roni Herrán, que se pode visitar ata o 29 de agosto, está composta de pinturas, ilustracións e esculturas que indagan nas dimensións social e individual na construción da identidade
Roni Herrán, artista multidisciplinar, inaugurou onte nas instalacións da Asociación Área Empresarial do Tambre en Santiago, a súa exposición de pintura, ilustración e escultura, ExNihilo… ExMateria… Trátase dunha selección de pinturas e ilustracións, e outras tantas esculturas, realizadas con óleo, técnicas mixtas, instalación, forxa, cerámica, gravado ao ácido, soldadura, dourado con pan de ouro ou técnica de baleirado e bioplásticos.
Segundo explicou o propio autor Roni Herrán durante a presentación da mostra, o título da exposición fai referencia a dúas ideas complementarias sobre a construción da identidade: Ex Nihilo e Ex Materia.
“Ex Nihilo significa dende a nada e alude á parte intanxible, interna ou simbólica da identidade, que parece xurdir sen forma previa, e Ex Materia significa desde a materia e representa o paso ao concreto, ao corpo, ao visible”, explica Herrán quen precisa que a exposición parte desa tensión entre o invisible e o material, entre o que somos e o que se nos impón, para trasladalo á linguaxe escultórica e pictórica.
A artista destaca que a mostra reflexiona sobre a construción da identidade a través de dous proxectos que abordan as súas dúas grandes dimensións: a individual e a social. Apunta que a exposición nace dunha necesidade de comprender como se forma a identidade, desde o interno e o externo, “o que nos moldea e o que decidimos soster”.
Os interesados en visitar ExNihilo… ExMateria… da ourensana Roni Herrán poderá facelo ata o vindeiro 29 de agosto, en horario de luns a venres de 9:00 a 14:00 horas e de 16:00 a 20:00 horas. Dende a Asociaición Área Empresarial do Tambre de Santiago recomendan avisar previamente da visita no teléfono 981 553 850.
