Os deportistas da Escola Ayude foron homenaxeados polos Concellos de Melide e Santiso polos triunfos colleitados a nivel nacional e internacional
Os deportistas e técnicos da Escola Ayude de Melide recibiron, o pasado 1 de novembro, un recoñecemento conxunto por parte dos Concellos de Melide e Santiso polos seus méritos e éxitos alcanzados nas competicións nacionais e internacionais nas modalidades que imparte a escola: esgrima, loitas olímpicas, kickboxing e boxeo.
Os representantes de ambos municipios destacaron o gran labor tanto deportivo como social que está a desenvolver a Escola Ayude e animaron aos seus deportistas a seguir traballando e manter a mesma liña de éxitos que desde hai tempo converteunos nun refererente para a canteira destas especialidades deportivas en Galicia.
Os 21 deportistas e os técnicos da Escola Ayude recibiron un diploma en recoñecemento ao seu labor, e os representantes dos concellos destacaron o feito de que a escola conte con alumnos procedentes de 12 municipios diferentes, o que certifica á escola como referente en Galicia destas especialidades, ademais do seu labor social e promoción do deporte, para o que contan co apoio dos departamentos de Asuntos Sociais dos Concellos de Melide e Santiaso a través de sendos convenios de colaboración.
