O Concello de Fene fai un chamamento ao civismo e ten que retirar as casetas danadas, que veñen sufrindo varios ataques vandálicos nos últimos meses
Os reiterados actos vandálicos que levan sufrindo as pistas de atletismo de Barallobre nos útimos meses obrigan ao Concello de Fene a retirar as casetas situadas na instalación deportiva municipal. A estrutura apareceu novamente co mobiliario esnaquizado, malia que xa foran denunciados ataques anteriores.
O concelleiro de Deportes, Adán Chao, visitou as instalacións para facer unha valoración e lamentou a situación, subliñando que “estes actos vandálicos non só deterioran un espazo público pensado para uso e desfrute da veciñanza, senón que tamén supoñen un custo adicional para o concello”.
O edil responsable da área de Deportes explicou que, ante a imposibilidade de garantir a súa seguridade, “vémonos na obriga de proceder á súa retirada para evitar máis danos”, mais o Concello de Fene reitera o seu compromiso co mantemento das instalacións deportivas municipais e fai un chamamento ao civismo para preservar os espazos públicos.
