Ribadavia congregará durante esta fin de semana a 890 atletas de toda Galicia no Memorial Alejandro Lorenzo, para deportistas de base, e no Campionato Xunta, para veteráns
Ribadavia acolle esta fin de semana unha das citas máis relevantes do calendario atlético galego coa celebración do Memorial Alejandro Lorenzo e do Campionato Xunta de Galicia de Campo a Través Máster, que terán lugar no circuíto de A Veronza e reunirán a un total de 890 atletas de toda Galicia.
A competición inclúe probas das categorías Sub-10, Sub-12, Sub-14 e Máster, combinando deporte base e atletismo veterano nunha xornada que pecha o calendario autonómico de campo a través do ano 2025. A elevada participación e o nivel dos inscritos consolidan Ribadavia como unha das sedes de
referencia para este tipo de eventos deportivos.
Entre os participantes figura a presenza de numerosos campións e campioas galegas da pasada edición, así como de atletas máster con destacada traxectoria internacional, incluídos medallistas en campionatos europeos, o que reforza o prestixio da cita e sitúa Ribadavia no foco do atletismo galego e estatal.
Unha vez rematadas as probas das categorías Máster, a xornada continuará co Memorial Alejandro Lorenzo, unha competición con máis de 25 anos de historia, vencellada ao atletismo base e ao Campionato Xunta de Galicia das categorías Sub-10, Sub-12 e Sub-14. Esta proba constitúe unha referencia para a promoción do deporte entre os máis novos.
Desde o Concello de Ribadavia destácase o impacto positivo que eventos destas características teñen tanto a nivel deportivo como social e económico, cunha importante afluencia de deportistas, familias e acompañantes durante toda a fin de semana.
O alcalde de Ribadavia, César Fernández, sinalou que “a celebración dunha competición con esta participación e nivel confirma a capacidade do municipio para acoller eventos deportivos de primeiro nivel e pon en valor o traballo realizado nos últimos anos nas instalacións municipais e na organización”.
O Concello quixo tamén agradecer a colaboración da Federación Galega de Atletismo, así como o labor do persoal municipal e do voluntariado, fundamentais para garantir o bo desenvolvemento dunha cita que volve situar Ribadavia como referente do atletismo galego.
