Os nomes dos mellores deportistas do ano daranse a coñecer durante o transcurso da XVII Gala do Deporte de Ames que se desenvolverá a partir das oito e media da noite no auditorio da Casa da Cultura de Bertamiráns
O auditorio da Casa da Cultura de Bertamiráns acollerá mañá venres 9 de maio, a XVII Gala do Deporte do Concello de Ames, na que se homenaxeará aos deportistas e ás entidades deportivas máis destacadas do municipio neste eido ao longo da pasada tempada. O acto terá lugar a partir das oito e media da tarda, e estará presentado polos xornalistas Lorena Pose e Diego Viaño.
Ata o momento, só se coñecen os premiados na categoría de recoñecemento especial, que se lle outorgará a Jorge Pérez do Club Ciclista Os Esfola Arrós, e á entidade colaboradora, na que se recoñece o traballo de colaboración do Real Aero Club de Santiago en diversos eventos deportivos organizados polo Concello.
Durante a gala do Deporte de Ames, no auditorio da Casa da Cultura de Bertamiráns, daranse a coñecer os gañadores dos premios nas seguintes categorías: deportista ou equipo máis destacado dun club de Ames, promesa masculina máis destacada, promesa feminina máis destacada, deportista masculino máis destacado, deportista feminina máis destacada e o club máis destacado.
Ademais, como vén sendo habitual, entregarase o premio do público ao/á seu/súa deportista favorito/a e cuxa votación pechou o pasado mércores, entre os candidatos: Tariku Novales, Nuria Rábano, Guillermo Carracedo, Blanca Millán e Pablo Fernández.
