O conselleiro de Sanidade, Antonio Gómez Caamaño, destacou os avances do proxecto piloto de cribado de cancro de próstata que a Xunta está a desenvolver na área sanitaria de Ferrol. Así pois, chega ao seu ecuador con 6.000 homes convidados e unha participación do 41 %.
Gómez Caamaño adiantou os primeiros resultados do proxecto despois de reunirse no Hospital Arquitecto Marcide co persoal dos servizos de uroloxía, radioloxía, anestesia, enfermaría, anatomía patolóxica, análises clínicas, informática e admisión. Na xuntanza tamén participaron a delegada territorial da Xunta, Martina Aneiros; a directora xeral de Saúde Pública da Consellería, Carmen Durán; e a xerente da área sanitaria de Ferrol, Fernanda López Crecente.
Despois de seis meses da posta en marcha da iniciativa, de todas as probas realizadas e tras a previa valoración clínica, fixéronse oito biopsias e agora, tal e como sinalou o conselleiro, agárdase coñecer os resultados nas próximas semanas.
Unha vez finalice a recollida de mostras previstas dos 12.000 homes de 50 a 69 que serán invitados en total, a Consellería de Sanidade avaliará os resultados para así poder determinar a viabilidade e a conveniencia de estender o cribado ao resto de Galicia. Neste sentido, trátase dun estudo moi relevante, xa que o cancro de próstata é o máis común entre os homes e ten unha alta taxa de mortalidade.
DETECCIÓN PRECOZ DO CANCRO
A Xunta mantén a súa aposta pola detección precoz do cancro con cribados consolidados de mama, cérvix e colorrectal, ademais de estar a desenvolver outra pilotaxe na área sanitaria da Coruña e Cee para detectar cancro de pulmón.
Na mesma liña de mellorar o diagnóstico e anticiparse a complicacións, a Xunta licitou a compra dun novo ecógrafo de alta resolución, por máis de 90.000 euros, para o servizo de uroloxía do Complexo Hospitalario de Ferrol. Este equipamento facilitará o diagnóstico de lesións de próstata con imaxes de alta resolución espacial e temporal, cun maior detalle dos bordes a altas profundidades.
