O presidente da Confederación Hidrográfica do Miño-Sil (CHMS), José Antonio Quiroga, convocou aos órganos de goberno, participación e cooperación da demarcación. Así, o organismo autónomo, dependente do Ministerio para a Transición Ecolóxica e o Reto Demográfico (MITECO), emprazou á Xunta de Goberno, o Comité de Autoridades Competentes e o Consello da Agua.
No encontro deuse conta da exposición pública dos documentos iniciais do 4º ciclo de Planificación Hidrolóxica, do novo Plan Especial de Seca e da necesidade do uso sostible e eficiente da auga; e da evolución dos datos das Áreas con Risco Potencial Significativo de Inundación. Así mesmo, abordouse a previsión económica para 2025, entre outros asuntos de interese.
PLANIFICACIÓN HIDROLÓXICA NA DEMARCACIÓN DO MIÑO-SIL
Está aberto o período de consulta e información pública dos documentos iniciais correspondentes ao cuarto ciclo de planificación hidrolóxica 2028-2033. É o cuarto dende a entrada e vigor da Directiva Marco no 2000 e o quinto dende a aprobación do primeiro plan hidrolóxico na conca en 1998. Así, poderanse presentar propostas, observacións e suxestións ata o 20 de xuño de 2025.
Os documentos iniciais constitúen a primeira fase de elaboración do novo proxecto de plan hidrolóxico para o ciclo 2028-2033. A esta seguiralle a finais de ano o Esquema de Temas Importantes en materia de xestión das augas. A continuación, en 2026 abordarase o proxecto de novo plan hidrolóxico na demarcación do Miño-Sil, que deberá ser aprobado antes do final de 2027.
Estes documentos están conformados por unha descrición das principais actividades a realizar durante todo o proceso planificador, o calendario previsto, o estudo xeral sobre a Demarcación Hidrográfica do Miño-Sil, as fórmulas de consulta, os puntos de contacto para obter a información base, o proxecto de participación pública e a programación para a coordinación dos procesos de consulta pública do plan hidrolóxico cos da Avaliación Ambiental Estratéxica do plan.
DESENVOLVEMENTO E SEGUIMENTO DA APLICACIÓN DO PLAN HIDROLÓXICO
En relación co estado das masas de auga, conforme a última avaliación realizada no ano 2023, das 287 delimitadas, 192 masas de auga superficiais teñen bo estado (un 67 %). No tocante ás augas subterráneas, 22 alcanzan o bo estado (92%) e dúas diagnostícanse como malo (8%). O grao de avance do programa de medidas no primeiro ano de vixencia do plan é de 18 %, cun investimento de 82 millóns de euros no ano 2023.
PLAN ESPECIAL DE SECA
O Consello da Auga da Demarcación informou favorablemente da proposta de proxecto do novo plan especial de actuación en situacións de alerta e eventual seca, en cumprimento da Lei do Plan Hidrolóxico Nacional e do Regulamento da Planificación Hidrolóxica.
O proxecto de plan especial de seca tivo dous períodos de información e audiencia pública, cunha achega de 29 escritos de propostas e suxestións, incluíndo 162 observacións. Así, o plan recolle a descrición da demarcación, a identificación de seis unidades territoriais de seca prolongada e escaseza conxuntural, unha descrición detallada das unidades territoriais de escaseza, o rexistro de secas históricas e impacto do cambio climático, así como o sistema de indicadores e índices de estado e as medidas a aplicar en cada escenario para atenuar as consecuencias ambientais, económicas e sociais destes fenómenos.
Así mesmo, incorpora a consideración de estudos nacionais (CEDEX) e internacionais (IPCC, JRC, AEMA) sobre adaptación ao cambio climático e a súa incidencia na xestión das secas. Segundo o presidente da CHMS, unha vez aprobado definitivamente, este proxecto constituirá o terceiro plan de seca da Demarcación. Neste sentido, salientou que é fundamental a colaboración de todas as administracións e a concienciación cidadá no uso sostible e eficiente do recurso da auga.
AVALIACIÓN PRELIMINAR DO RISCO DE INUNDACIÓN
A proposta final da CHMS para os tramos seleccionados como Áreas con Risco Potencial Significativo de Inundación (ARPSIs), elevada ao Comité de Autoridades Competentes e aprobada, conclúe que a demarcación do Miño-Sil ten 618,99 quilómetros de ríos en zona ARPSIs, repartidos en 26 agrupacións.
“É importante destacar que 569,23 quilómetros corresponden a ARPSIs que se manteñen iguais que no 2º ciclo; 33,84 quilómetros ARPSIs que se ampliaron respecto ao 2º ciclo; e 15,92 quilómetros ARPSIs que se propuxeron novas neste terceiro ciclo”, explicou o presidente da CHMS.
DATOS ECONÓMICOS
Durante o exercicio 2024 prorrogáronse automaticamente os orzamentos iniciais do exercicio anterior. A falta da rendición da conta, segundo os datos provisionais operantes no sistema de contabilidade, a execución do orzamento de gastos alcanza o 65 % do orzamento inicial, 6 puntos máis que no exercicio precedente e 10 máis que en 2022. Polo que respecta ao orzamento de ingresos, os dereitos recoñecidos ascenden ao 89% da previsión inicial de ingresos.
Como explicou José Antonio Quiroga, a día de hoxe non foron aprobados os orzamentos xerais do Estado de 2025, polo que dende o 1 de xaneiro prorrogáronse automaticamente os do exercicio anterior. Non obstante, a proposta de orzamento da CHMS para 2025 ascende a 52,8 millóns de euros, un 9,72% máis con respecto ao vixente.
Polo que se refire aos ingresos, o máis destacable é que a previsión de ingresos para o exercicio 2025 prescinde das transferencias de capital da Dirección Xeral da Auga, xa que se prevé que os recursos propios do organismo serán suficientes para facer fronte aos gastos.
