O proxecto da dragaxe do porto de Espasante, promovido por Portos de Galicia, entrou en fase de información pública. Este é o paso previo á licitación, por un importe de 1.164.340,35 euros. Trátase dunha das actuacións máis relevantes da historia recente de Ortigueira, pola súa envergadura económica e impacto directo na operatividade do porto e protección do litoral.
O obxectivo deste proxecto é resolver os problemas de sedimentación que dificultan actualmente o uso normal do porto. Esta situación, provocada pola dinámica natural de acumulación de sedimentos, impide que moitas embarcacións poidan manobrar ou atracar en condicións axeitadas. A intervención contempla un plan plurianual de dragaxe, cunha primeira fase de recuperación do calado e futuras actuacións de mantemento adaptadas ás necesidades.
En total, dragaranse 42.150 metros cúbicos de material na primeira intervención e 33.437,50 metros cúbicos no cuarto e derradeiro ano. A zona abarca o acceso ao porto e a dársena interior, sobre unha superficie que supera os 24.000 metros cadrados.
O material extraído, catalogado por Portos de Galicia como apto para a reutilización, terá como destino prioritario a praia da Concha, tamén en Espasante. Este sedimento contribuirá a frear o retroceso da liña de costa e a estabilizar o sistema de dunas. O transporte realizarase mediante unha draga de succión e unha condución flotante. Asemade, contémplase unha alternativa técnica para o vertido nunha zona autorizada en alta mar, situada a unhas sete millas do porto.
Ao ser o proxecto exposto ao público, tanto as administracións afectadas como a cidadanía poderán presentar alegacións ou observacións sobre os posibles efectos ambientais na contorna.
O alcalde de Ortigueira, Valentín Calvín, destacou que “esta é unha obra largamente esperada polo sector marítimo do municipio”. Neste sentido, a dragaxe de Espasante é fundamental para recuperar a operatividade do porto e garantir que as embarcacións poidan traballar con normalidade e seguridade durante todo o ano. Finalmente, o rexedor sinalou que este investimento demostra “a implicación de Portos de Galicia e o Goberno autonómico con Ortigueira”.
