A delegada territorial da Xunta en Ferrol, Martina Aneiros, participou no teatro Jofre de Ferrol na gala de entrega dos IX Premios Ferrolterra Emprende. Con estes galardóns, AJE Ferrolterra segue fomentando a vocación empresarial dos novos empresarios e empresarias. Así mesmo, premia o traballo a través de proxectos innovadores ou iniciativas xa consolidadas.
Durante a súa intervención, Aneiros destacou a colaboración coa Asociación de Jóvenes Empresarios de Ferrolterra á hora de impulsar o emprendemento e a xeración de emprego nas comarcas de Ferrol, Eume e Ortegal. Na mesma liña, puxo en valor iniciativas como os Polos de emprendemento, como o de Ferrol, con máis de 370 proxectos atendidos desde a súa posta en funcionamento en 2022. A delegada autonómica tamén salientou as diferentes convocatorias de axudas como exemplos das políticas da Xunta a prol do fomento do emprendemento.
Finalmente, Aneiros avanzou que, de cara ao próximo ano, a Xunta facilitará e impulsará o traballo autónomo coa simplificación nunha única convocatoria das axudas específicas para este sector, dotada con 40 millóns de euros para 2025. A maiores, matizou que se complementará coas destinadas ao emprendemento neste colectivo, ata superar os 60 millóns anuais.
