A Xunta de Galicia está a acometer traballos de conservación na senda peonil e ciclista da estrada autonómica AC-130, entre Ares e Mugardos. A delegada territorial da Xunta en Ferrol, Martina Aneiros; o alcalde de Mugardos, Juan Domingo de Deus; e a directora territorial da Consellería de Vivenda e Planificación de Infraestruturas, Begoña Freire, supervisaron o avance das obras.
Os traballos, cun investimento autonómico de 50.000 euros, desenvólvense entre os puntos quilométricos 0+970 e o 1+870 ata o límite co municipio de Ares. En concreto, estase a actuar sobre unha superficie de 900 metros lineais e de 2,50 metros de ancho. Nos traballos de rehabilitación desta senda empregouse formigón coloreado.
Esta infraestrutura viaria de 3,7 quilómetros de lonxitude foi impulsada pola Xunta de Galicia, cun investimento de 1,5 millóns de euros. O obxectivo era canalizar de forma segura o tránsito peonil e ciclista nesta estrada autonómica. Xunto a esta senda, o Goberno galego impulsou a construción doutras dúas no municipio de Mugardos, a que conecta Franza e Rilo pola estrada AC-133 e a que discorre entre O Peteiro e O Baño, en paralelo á estrada AC-131.
A delegada territorial destacou que deste xeito a Xunta continúa dotando as vías autonómicas de itinerarios seguros, sostibles e saudables para favorecer os desprazamentos a pe dos peóns que son os usuarios máis vulnerables das estradas.
