A Xunta de Galicia investirá 600.000 euros na renovación da cuberta do centro de educación especial Terra de Ferrol. Co gallo deste proxecto, o conselleiro de Educación, Ciencia, Universidades e Formación Profesional, Román Rodríguez; a delegada territorial da Xunta en Ferrol, Martina Aneiros; e o alcalde de Ferrol, José Manuel Rey Varela, visitaron as instalacións educativas.
Os traballos centraranse na substitución das cubertas, que suman máis de 4.000 metros cadrados. Esta superficie inclúe os dos módulos do 1 ao 8, taller de carpintería, corredor central e soportais exterior e de xogo. A previsión é iniciar a obra a comezos de xullo para tela rematada entre novembro e decembro.
“É unha satisfacción comprobar o compromiso de investimento coas persoas e coa educación da Xunta en Ferrol”, manifestou o alcalde ferrolán. Así mesmo, lembrou todo o programa de investimentos que a Consellería está a facer na cidade. Neste sentido, lembrou o convenio de colaboración entre Administración autonómica e local para a realización de obras de mellora nas instalacións deportivas dos dez CEIPs de Ferrol. “Seguimos traballando conxuntamente para que en Ferrol teñamos os mellores centros educativos para o futuro dos nenos e nenas”, concluíu o rexedor.
Pola súa banda, o conselleiro destacou o importante papel activo que exercen centros como o Terra de Ferrol para favorecer a inclusión educativa. Asemade, subliñou que a Xunta traballa “desde o espírito de mellora constante”.
