A Xunta de Galicia está a acometer obras de mellora en tres tramos de estradas autonómicas ao seu paso polo Concello de Ares. A actuación supón o investimento de 240.000 euros e afecta á AC-123, AC-124 e AC-130. As obras supoñen o paso previo á tramitación da transferencia da titularidade dos mesmos a prol do Concello de Ares.
Concretamente os traballos desenvólvense na actualidade na estrada AC-123, entre os puntos quilométricos 1+190 e 2+210. Alí desprazouse a delegada territorial da Xunta en Ferrol, Martina Aneiros, acompañada da directora territorial da Consellería de Vivenda e Planificación de Infraestruturas, Begoña Freire. A intervención contempla a reposición da sección completa entre beirarrúas e a execución dunha glorieta no punto quilométrico 2+080.
Xunto a esta vía, tamén se están a executar melloras na AC-130, no treito comprendido entre os puntos quilométricos 3+400 e 4+240. Neste caso, adecuarase a capa de rodaxe entre beirarrúas.
Proximamente iniciaranse os traballos na AC-124, no tramo urbano de Redes, entre os puntos quilométricos 1+770 e 1+170. Neste último caso procederase á reposición dos carrís. Os traballos nas tres vías contemplan ademais a renovación da sinalización horizontal e o recrecido dos rexistros existentes.
