O Concello de San Sadurniño abriu onte, domingo 16 de marzo, o segundo período de solicitude de praza na EIM A Rolada. Este prazo está dirixido ás familias que queiran matricular por primeira vez as súas crianzas en calquera das tres unidades onde queden vacantes tralo período de reserva. O último día para presentar a documentación é o 31 de marzo e o trámite pode facerse a través da Sede Electrónica Municipal ou presencialmente na oficina do rexistro.
Os servizos da EIM A Rolada diríxense preferentemente a familias empadroadas no municipio con nenos e nenas de entre tres meses e tres anos de idade. Só no caso en que haxa vacantes poderá admitir alumnado doutros concellos, priorizando aquelas familias que teñan o seu posto de traballo nunha empresa de San Sadurniño.
A escola dispón de 38 prazas distribuídas en tres unidades: 8 na de nenos e nenas de tres meses a un ano, 13 na de criaturas de un a dous anos e 17 na ocupada por cativería de entre dous e tres anos.
O horario de apertura máximo é de 8 da mañá a 8 do serán de luns a venres. Dentro deste lapso, pódense elixir de catro a oito horas de atención educativa. Esta posibilidade ten, á súa vez, tres opcións: xornada completa, media xornada de mañá (9:00 a 13:00h) ou media xornada de tarde (15:00 a 19:00h). Os horarios de tarde están suxeitos a que haxa unha porcentaxe mínima de solicitudes que permitan manter o servizo.
A parte educativa complétase con servizo de comedor, actividades paralelas e extraescolares e con saídas e excursións dentro do horario de atención, como parte fundamental do currículo do centro.
O servizo de conciliación é gratuíto en canto a matrícula e custes de atención. Non obstante, exclúense desta gratuidade os servizos complementarios, como o comedor. Ademais, en cumprimento da orde autonómica de gratuidade, a Xunta subvenciona unha parte do mantemento e dos servizos educativos, mentres que o Concello asume a outra parte para garantir que a atención sexa realmente de balde para as familias.
As prazas non se adxudicarán por orde de rexistro, senón que serán valoradas de acordo co regulamento de funcionamento do centro.
