A Revista Galega de Educación, publicación editada polo Movemento de Renovación Pedagóxica Nova Escola Galega, sacou á rúa o seu número 93, que está centrado na situación da radio escolar en Galicia.
En Galicia hai experiencias moi meritorias de radio escolar desde hai décadas, e mesmo a radio como ferramenta didáctica é o eixe central de iniciativas recoñecidas internacionalmente como o proxecto Ponte… nas Ondas! Pero é especialmente nos últimos anos cando a radio como recurso educativo se xeneralizou nos centros galegos, sobre todo a partir dos programas de bibliotecas escolares.
Dalgún xeito, falar de radio, educación e vida, é un proceso de deconstrución da última xa que, coas ferramentas, aprendizaxes e coñecementos adquiridos, ondas e ensino son alicerces na formación de calquera persoa. Para adquirir todas esas aprendizaxes, convidamos o lectorado desta Revista Galega de Educación (RGE) a mergullarse con nós nas diferentes perspectivas educacionais, radiais, vitais, que neste monográfico amosamos, manifestan na presentación do número os seus coordinadores, os xornalistas Sergio Pascual Espinilla e Lucía Abarrategui Amado.
A biblioteca Xosé Vázquez Pintor de Melide acollerá mañá venres ás 20h un acto de presentación do último número da Revista Galega de Educación adicado á radio na Terra de Melide. A entrada será de balde.
