O Concello das Somozas contratou a unha traballadora para desenvolver tarefas agrícolas e de mantemento de espazos verdes, grazas ao Programa de Garantía Xuvenil. Neste sentido, a delegada territorial de Ferrol, Martina Aneiros, desprazouse ao municipio para coñecer o seu labor.
A Xunta apoia este ano a contratación de 13 persoas mozas desempregadas en dez concellos das comarcas de Ferrol, Eume e Ortegal, con cargo ás axudas da Consellería de Emprego, Comercio e Emigración.
Aneiros incidiu en que a través destas axudas, o Goberno galego pretende incentivar a contratación de persoas mozas, de entre 18 e 29 anos, en entidades locais e organismos intermedios sen ánimo de lucro. Deben ser beneficiarias do Sistema Nacional de Garantía Xuvenil e estar inscritas no Servizo Público de Emprego de Galicia.
A consellería destinou á convocatoria deste ano un orzamento de 6,5 millóns de euros, cofinanciados pola Unión Europea a través do Programa FSE de Galicia 2021-2027. Está destinada a subvencionar a contratación a xornada completa dos mozos e mozas por un período de nove meses. “O obxectivo fundamental é que os beneficiarios acaden unha experiencia laboral que lles permita integrarse no mercado laboral”, explicou Martina Aneiros durante a visita ás Somozas.
Ademais das Somozas, tamén se beneficiaron destas axudas os concellos de Pontedeume, Ortigueira, Moeche, Fene, Cerdido, Cedeira, Cariño e Ares, cun contrato por concello. Pola súa banda, o Concello de Ferrol, recibiu unha achega para subvencionar a contratación de catro traballadores.
