O alcalde de Barbadás, Xosé Carlos Valcárcel, e o concelleiro de Emerxencias, Dani Rey, visitaron a sede da Dirección Xeral de Santiago de Compostela. Alí mantiveron unha reunión co director xeral de Emerxencias e Interior da Xunta de Galicia, Santiago Villanueva, e o subdirector xeral de Planificación e Protección Civil, José Antonio Grandas.
No encontro tratáronse diferentes asuntos que afectan aos servizos municipais de Protección Civil e Policía Local. Así, os representantes municipais solicitaron a actualización do seu material e equipamento para facer fronte ás emerxencias, debido ao gran volume de intervencións que realizan ambos grupos.
Unha das necesidades trasladadas foi a dotación de novos vehículos a ambos servizos. Neste sentido, o director xeral de Emerxencias explicou as diferentes opcións dispoñibles para esta finalidade.
Outro dos asuntos tratados foi a cobertura das emerxencias no Concello de Barbadás, que actualmente asume o servizo municipal de emerxencias, os bombeiros do polígono e o GES do Pereiro de Aguiar. Así pois, os representantes locais e autonómico coincidiron en que o futuro pasa polas comarcalizacións dos parques de bombeiros das capitais.
INCLUSIÓN DA POLICÍA LOCAL NA REDE TETRA DE COMUNICACIÓNS
A rede TETRA de comunicacións tamén formou parte das conversas mantidas na reunión na sede da Dirección Xeral de Santiago. Trátase dunha rede dixital de comunicacións que actualmente xa utiliza o servizo de Protección Civil e que se pretende ampliar á Policía Local.
Para este fin, os responsables municipais farán as xestións oportunas ante a Axencia Galega de Emerxencias (AXEGA) e a empresa pública RETEGAL para proceder a unha implantación progresiva deste sistema nos corpos de seguridade e emerxencias municipais.
