A xunta de Goberno local do Concello de Ferrol aprobou dúas concesións demaniais a favor do Concello de Ferrol que suman en total 7.772,68 metros cadrados. Trátase dun paso máis no proxecto Abrir Ferrol ao mar, un dos “maiores proxectos de transformación urbana da cidade”, segundo o alcalde ferrolán, José Manuel Rey Varela.
En relación ás concesións demaniais, a primeira corresponde ao tramo da parcela denominada xardíns contiguos á muralla de peche do arsenal militar, correspondente ás rúas do Rastro e do Espírito Santo. Trátase dunha superficie de 2.147,82 metros cadrados e estará destinada á creación dunha senda verde e peonil e carril bici.
“Abrir Ferrol ao mar implica unha profunda actuación en todo o ámbito lindeiro ás instalacións do Ministerio de Defensa situadas na marxe da ría de Ferrol e precisamos estas autorizacións da ocupación e uso de bens de dominio público para levar a cabo este ambicioso proxecto”, matizou o rexedor.
Así, a Dirección Xeral de Infraestrutura da Secretaría de Estado de Defensa vén de remitir, para a súa aceptación, os pregos de condicións particulares que rexerán a concesión a favor do Concello de Ferrol na parcela denominada xardíns contiguos á muralla de peche do arsenal militar.
Dende o Concello de Ferrol explicaron que teñen que contar coa conformidade do Ministerio de Defensa para as obras a executar, polo que remitirán aos servizos técnicos do Ministerio as memorias ou proxectos das actuacións previstas.
A presente concesión terá unha duración de 20 anos e poderá ser prorrogada por períodos quinquenais, ata completar o máximo permitido de 75 anos.
APARCAMENTO INTERIOR DE NAVANTIA
Á parcela denominada xardíns contiguos á muralla de peche do arsenal militar, súmanse outros 5.624,86 metros cadrados da parcela sobre a que se asenta o aparcamento interior dentro da Navantia, na zona da porta do estaleiro. “Tamén contamos coa cesión demanial para continuar co proxecto de Abrir Ferrol ao mar no tramo 2”, avanzou Rey Varela. O prazo de duración da concesión será de dez anos, tamén prorrogables.
A utilización privativa destes dous bens de dominio público non leva aparellada unha utilidade económica, polo que non esixe contraprestación económica algunha do Concello de Ferrol a favor do Estado.
CESIÓNS DO IGVS A FERROL
Ademais, na xunta de Goberno local aprobouse solicitar ao Instituto Galego da Vivenda e Solo o inicio das actuacións procedentes para a cesión gratuíta do uso ao Concello de Ferrol da parcela a dos xardíns na rúa Taxonera. O municipio pretende a cesión, libre de cargas e gravames, dunha superficie de 3.960 metros cadrados, que se une ás xa solicitadas. Trátase da parcela situada entre as rúas 5 e Telleiras, cunha superficie de 1.376 metros cadrados; e a parcela situada entre as rúas 14, Fonte da Greza, 5 e Telleiras, cunha superficie de 1.129 metros cadrados.
“Estas actuacións permitirannos aumentar a dotación de zonas verdes e prazas dispoñibles e dar servizo aos residentes e usuarios das zonas de estancia e de ocio destes barrios, ao tempo que potencian a mobilidade”, asegurou o alcalde.
Estes preto de 6.500 metros cadrados son fundamentais para localizar os aparcamentos disuasorios e o desenvolvemento das actuacións previstas no proxecto de Abrir Ferrol ao mar. Así, darase resposta aos obxectivos da mobilidade sostible na fachada marítima e portuaria da cidade. Neste sentido, o Concello de Ferrol deberá manter o compromiso de dita finalidade durante un período mínimo de 15 anos.
