O presidente do Clúster de Enerxías Renovables de Galicia (Cluergal), José Ramón Franco, e o director xeral de Planificación Enerxética e Minas da Xunta, Pablo Fernández Vila, inauguraron esta mañá o congreso Energy Days. Un foro de debate sobre enerxía, industria e dixitalización que terá lugar na Cidade da Cultura de Santiago de Compostela ata o 10 de outubro e que “nace coa vocación de ser o gran punto de encontro do sector enerxético no nordés peninsular”, segundo José Ramón Franco.
O director de Cluergal destacou que a enerxía, a industria e a dixitalización son tres sectores “que se atopan nun estado de innovación permanente e que nos esixen compartir coñecemento en espazos de colaboración aberta como os Energy Days”. Neste sentido, indicou que “nos últimos anos o binomio de desenvolvemento relacionado coa transición enerxética e a transformación dixital está a cambiar a nosa sociedade e, por suposto, a nosa industria, afectando á estratexia de fabricantes, enxeñerías e empresas de servizos”.
Aposta da Xunta polas enerxías renovables
Pola súa banda, Fernández Vila incidiu na importancia de apostar polas enerxías renovables nun territorio rico nestes recursos como é Galicia e, deste xeito, seguir reducindo a dependencia enerxética do exterior. Nesta liña, a nova Lei de promoción dos beneficios sociais e económicos dos proxectos que utilizan os recursos naturais de Galicia impulsada pola Consellería de Economía e Industria servirá de aval para que esa riqueza natural transfórmese en riqueza social, garantindo que os proxectos que aproveiten os recursos naturais beneficien á cidadanía galega.
Ademais, o director xeral de Planificación Enerxética e Minas apuntou a importancia das zonas experimentais de enerxías mariñas para avanzar nun sector “fundamental dentro do binomio enerxía-industria”, pero garantindo sempre a coexistencia e compatibilidade co medio mariño e coa actividade xa implantada. “Contar cunha área de ensaio onde levar a cabo actividades que favorezan o desenvolvemento tecnolóxico e de estudos relacionados co medio mariño, a biodiversidade e os recursos enerxéticos renovables permitiranos seguir avanzando nos ámbitos enerxético, ambiental e socioeconómico”, asegurou Pablo Fernández. Ademais, lamentou que o Real decreto que regula o réxime autorizatorio da eólica mariña “chegue con dous anos de atraso e continúe sen dar seguridade xurídica ao sector”.
Sobre a mobilidade sostible, confirmou que a Xunta seguirá apoiando o proceso de transición a vehículos máis eficientes, incentivando a demanda con máis axudas e menos burocracia e cunha maior planificación e investimento en infraestruturas e redes de abastecemento e transporte. Por outra banda, Pablo Fernández Vila destacou o labor do Inega como xestor dos certificados autonómicos de aforro enerxético, aceptando solicitudes que representan ao redor de 30 GWh de potencia.
Por último, o director xeral fixo referencia á dixitalización, onde a intelixencia artificial é unha das principais protagonistas. Neste punto, compartiu a necesidade de dispoñer dun marco ético recoñecible, seguro e aceptado por todos para o seu idóneo desenvolvemento. Por iso, a Xunta está a tramitar a Lei para o desenvolvemento e impulso da intelixencia artificial en Galicia, que converterá á Comunidade na primeira rexión europea en dispoñer dunha regulación única, sistemática e coherente cos principios comunitarios na materia.
Eficiencia enerxética
A eficiencia enerxética na industria centrou a primeira das tres sesións celebradas esta mañá no edificio CINC da Cidade da Cultura. Así, Silvia Fernández, project manager da zona Norte para o Grupo Eurofred, presentou as tendencias tecnolóxicas en sistemas HVAC (calefacción, ventilación e aire acondicionado) e para ACS (auga quente sanitaria), dando unha breve visión dalgúns dos sistemas dispoñibles e que irán aparecendo no sector.
Ademais, advertiu aos presentes sobre os cambios normativos que afectarán os equipos de refrixeración, aire acondicionado e bombas de calor segundo as cales a partir de 2030 non se poderán vender novos equipos que utilicen, por exemplo, gases fluorados cun PCA superior a 150 ou as restricións para a exportación do uso de F-Gas 2024.
Jorge Boquete, director comercial de LEDISSON LIGHTING, presentou as actuacións que se poden realizar para facer máis eficientes instalacións lumínicas en industrias nas que xa se realizaron intervencións previas de mellora da eficiencia enerxética.
Finalmente, Luis Pita, técnico de Planificación e Análise de Repsol A Coruña, presentou o caso concreto de como a eficiencia enerxética foi un piar básico na transformación do complexo industrial herculino. Neste sentido, Pita indicou que o obxectivo de Repsol é alcanzar as cero emisións netas para o ano 2050. Para conseguilo é necesaria unha planificación a curto, medio e longo prazo baseada tanto na eficiencia enerxética como na aplicación das novas tecnoloxías.
Mesas 2 e 3
A segunda mesa de debate xirou en torno aos Certificados de Aforro Enerxético, desde o seu contexto regulatorio ata o que poden aportar ás empresas industriais e do sector terciario para contribuír á mellora da eficiencia enerxética dos seus procesos.
Finalmente, na sesión 3 debateuse sobre autoconsumo e comunidades enerxéticas industriais. Así, Miguel R. Morgado, de Ecorés, puxo en valor os beneficios que as comunidades de enerxía achegan á integración do sector industrial, poñendo varios exemplos de comunidades con distintos perfís de consumo que xa están en desenvolvemento A xornada completarase con dúas sesións máis, mobilidade eléctrica e sostibilidade na industria.
Inicio de Enerdixital
Mañá mércores os Energy Days incluirán un seminario sobre combustibles sostibles e unha sesión sobre enerxías renovables e almacenamento de hidróxeno. Pola tarde abrirá as súas portas o congreso Enerdixital, un veterano evento que este ano se incorpora aos Energy Days e que arrincará cunha sesión sobre transición enerxética.
