O alcalde de Ferrol, José Manuel Rey Varela, deu onte a benvida aos participantes do congreso Polymer Processing 2024. Tamén asistiu á sala Carlos III de Exponav a delegada territorial da Xunta en Ferrol, Martina Aneiros.
Este congreso ten como obxectivo fomentar o intercambio de desenvolvementos e innovacións en áreas relacionadas coa enxeñería de polímeros. Así pois,reúne a 220 persoas procedentes de 29 países dos cinco continentes.
Así mesmo, coincide coa reunión rexional europea da Polymer Processing Society. O obxectivo desta entidade é promover a investigación para lograr a transformación dos materiais poliméricos en produtos listos para comercializar.
O rexedor ferrolán agradeceu á organización que escollera Ferrol como a primeira cidade española que acolle este encontro. Neste sentido, afirmou que “Ferrol está no mapa da alta formación e do progreso industrial” e fixo fincapé en que a cidade conta co primeiro Campus Industrial de España.
Precisamente, a través do Campus Industrial preténdese dar resposta aos retos que presenta a industria do futuro. “Estamos a contribuír ao desenvolvemento dunha industria máis intelixente, eficiente e respectuosa co medio ambiente”, manifestou o alcalde.
INAUGURACIÓN DO POLYMER PROCESSING 2024
Tras a benvida do alcalde e a delegada territorial da Xunta, hoxe tivo lugar a inauguración do congreso. Neste caso, contou coa participación da concelleira de Educación e Universidade, Patricia Cons.
A edil resaltou que este evento “fomenta a comprensión científica e a innovación técnica no procesamento de polímeros, proporcionando un foro para enxeñeiros e científicos de todo o mundo”.
