A xunta de Goberno local do Concello de Ferrol aprobou o proxecto básico e de execución para a reurbanización da rúa Rubalcava. Este ano licitarase a primeira fase, no tramo comprendido entre a rúa María e a avenida do Rei. Así, acometerase a mellora do firme, actualmente en mal estado, cun investimento de 1,5 millóns de euros.
No tocante á segunda fase, abarcará dende a rúa da Igrexa ata María. Neste caso, as obras terán un custo de 731.000 euros. Así pois, sumando ambas fases o investimento da reurbanización da rúa Rubalcava superará os 2,2 millóns de euros.
O proxecto ten a finalidade de mellorar a trama urbana na totalidade da rúa Rubalcava, favorecendo a súa dinamización e a relación coa praza de Armas. Este proxecto constitúe unha actualización do documento entregado en novembro de 2024, incorporando as modificacións requiridas na zona PEPRI para a obtención da autorización das obras por parte da Dirección Xeral do Patrimonio Cultural de Galicia, coa que xa conta o Concello.
SITUACIÓN ACTUAL DA RÚA RUBALCAVA
“Pretendemos dar unha unidade ao conxunto da urbanización, mellorar a escena urbana e o espazo público existente”, explicou o rexedor. Así pois, comprenderá tamén a renovacón ou substitución total ou parcial dalgunhas das redes de servizos urbanísticos existentes. En xeral, o estado dos pavimentos é deficiente, presentando irregularidades e depresións, rexuntados deficientes, encontros inadecuados con paramentos ou desigualdade entre superficies.
O pavimento empedrado, situado en zonas de tráfico rodado, é moi irregular e as superficies “teñen tanto badenes como fochancas provocadas polo uso continuado da calzada e o escaso mantemento”, lamentou Rey Varela. En canto ás beirarrúas de baldosa, atópanse en moitos puntos rotas debido á subida dos vehículos á mesma, aínda que o afundimento da zona anexa da calzada provoca tamén movementos na beirarrúa.
DÚAS FASES PARA A REHABILITACIÓN DA RÚA RUBALCAVA
A obra levarase a cabo en dúas fases. A fase 1 comprende a prolongación da rúa Rubalcava cara ao barrio de Canido, desde a rúa María a Sol e ata a avenida do Rei. Está fóra da área regulada polo PEPRI e a tipoloxía de actuación será como o da rúa Lugo. O importe de actuación é de 1.512.000 euros.
Da rúa María a Sol atopamos unha beirarrúa con lousa histórica, aparcamento de lastra e calzada de formigón con plataforma única. De Sol á avenida do Rei, a beirarrúa é de granito gris bóveda, o aparcamento de lastra e a calzada de formigón.
O alcalde explicou que se fará unha adecuada planificación das obras para minimizar a afección sobre os usuarios. En función da zona na que se actúe, podería ser necesario ordenar a circulación pola zona prevista para estacionamento de maneira provisional, para evitar que se altere o tráfico circulante e non se causen grandes retencións. Durante a realización dalgúns traballos podería ser necesario desviar o tráfico por outras rúas de maneira puntual.
A fase 2 corresponde ao tramo incluído no Plan Especial de Protección e Reforma Interior do Barrio da Magdalena (PEPRI), que abarca desde o cruzamento coa rúa Iglesia ata María, incluíndo a contorna da praza de Armas. O importe de actuación é de 731.000 euros.
A plataforma será única, é dicir, a zona de tráfico rodado e a peonil dos laterais estarán á mesma cota desde a intersección coa rúa da Igrexa ata o cruce coa rúa Sol, coa fin de ampliar a praza de Armas e priorizar o uso peonil. Este ámbito está suxeito a criterios específicos de actuación para preservar o seu patrimonio histórico e arquitectónico.
De Igrexa a Magdalena, as beirarrúas serán como na rúa da Igrexa, de lousas de granito gris bóveda, calzada de formigón pulido e aparcamento de lastra, como na rúa do Sol. De Magdalena a Real, será igual pero con lousa histórica. No tocante ás rúas de Real a María, a beirarrúa será de lousas históricas recuperadas, a zona de lastras peonil e calzada de formigón pulido.
OBRAS FASE 1
O obxectivo principal é lograr unha actuación unitaria e coherente, mellorando tanto a escena urbana como o espazo público existente. Para iso, proponse a renovación dos pavimentos de beirarrúas e calzada mediante a incorporación de materiais de calidade acordes coa edificación existente e coa estética das rúas perpendiculares, co propósito de dotar ao barrio da Magdalena dun carácter unificado e harmonizado.
Así mesmo, como parte da renovación dos pavimentos, proxéctase a reorganización e mellora das infraestruturas de servizos existentes, o que inclúe a súa substitución e a incorporación de novas canalizacións.
O pavimento das beirarrúas neste tramo proxéctase con laxas de granito gris. Na calzada, o carril de circulación terá un ancho de tres metros e estará executado cunha laxa de formigón armado con acabado pulido, de 25 centímetros de espesor.
A zona de aparcamento, situada na marxe esquerda, terá un ancho de 1,90 metros e pavimentarase con lastras de granito recuperados da demolición da rúa. Na intersección da rúa Rubalcava coa avenida Doutor Fleming e rúa da Améndoa, os pasos de peóns son elevados e executados con formigón armado negro de 25 centímetros de espesor.
O cruzamento con Doutor Fleming contará cun espazo de estancia con zonas axardinadas e bancos, que separarán as áreas peonís do tráfico rodado. Finalmente, en todo o tramo instalaranse novas luminarias. “Queremos unha rúa na que poidan convivir con seguridade os peóns e os condutores, que favoreza a circulación rodada e que haxa tamén espazos verdes de acordo cos criterios do proxecto do PMUS”, concluíu o alcalde de Ferrol.
