OS TERREOS, DE MÁIS DE 3.400 METROS CADRADOS, ESTÁN ANEXOS ÁS INSTALACIÓNS DO REFUXIO
O Concello de Ferrol pretende ceder á Mancomunidade de municipios da comarca de Ferrol varios terreos anexos ao refuxio de animais. Así o comunicou o tenente alcalde de Ferrol, Javier Díaz Mosquera, que presentou a proposta na comisión extraordinaria de Facenda.
Trátase dunha superficie de 3.403 metros cadrados, que serán cedidos ás instalacións do servizo mancomunado de lacería, recollida, aloxamento e control de animais domésticos e salvaxes. Neste senso, a cesión terá unha duración de 20 anos, é dicir, ata o 2044.
O ben inmoble deberá dedicarse exclusivamente aos servizos de benestar animal do refuxio detallados pola Mancomunidade, como a construción dun novo módulo para aloxamento de gatos e a preparación dun novo contrato de xestión do refuxio.
O Concello de Ferrol poderá inspeccionar en todo momento o estado de conservación dos terreos cedidos e sinalar as actuacións que deben realizarse, quedando obrigado o cesionario a executalas ao seu cargo no prazo que se sinale. Ademais, a Mancomunidade deberá manter en bo estado a parcela municipal, asumindo os gastos de conservación e mantemento e respondendo da seguridade e integridade da parcela.
Unha vez rematado o prazo da cesión, o ben reverterá ao Concello de Ferrol.
