O alcalde de Ferrol, José Manuel Rey, renovou o convenio de colaboración coa Asociación Provivienda por importe de 55.000 euros para este 2024. Esta achega está destinada a financiar o mantemento de dúas vivendas de inclusión social para persoas sen fogar.
“O obxectivo deste acordo é contribuír a mellorar a calidade de vida das persoas que máis o precisan”, asegurou o rexedor ferrolán. Ademais, a través destas vivendas ofrécese tamén apoio profesionalizado e personalizado.
Outro dos obxectivos é mellorar a súa autonomía persoal e social a través da adquisición de habilidades para o manexo e mantemento dun aloxamento autónomo. Así mesmo, preténdese promover as habilidades de convivencia e fomentar o contacto social.
Do mesmo xeito que o ano pasado, serán beneficiarias ata oito persoas sen fogar, que poderán acceder a un aloxamento estable. Máis en concreto, será a través do modelo de vivenda compartida, cunha duración inicial estimada de 24 meses. Na composición do grupo de convivencia terá prioridade do acceso ás mulleres.
Durante o período de duración do convenio, será posible valorar calquera axuste que permita a implantación das melloras que os usuarios requiran.
