O Concello de Ferrol sacou a licitación a rehabilitación do Bambú Club por máis de 485.000 euros. Este proxecto inclúese no convenio de transformación urbana firmado coa Consellería de Vivenda e Planificación de Infraestruturas o pasado mes de abril, que conta cun investimento de 12 millóns de euros. A Xunta de Galicia contribuirá cunha achega económica máxima de nove millóns de euros, equivalente ao 75% do orzamento estimado. Pola súa banda, o Concello de Ferrol farase cargo da contía restante.
UN EQUIPAMENTO SOCIAL PARA O BARRIO
O futuro Bambú Club contará cunhas instalacións dotadas de accesibilidade e percorridos de evacuación. Así mesmo, realizarase unha nova distribución para o aproveitamento do espazo. Está prevista a instalación de grandes portas corredoiras, que permiten dividir e unir distintas salas. Ademais, aproveitarase o espazo que marca a posición da corredoira para crear tres almacéns onde poder gardar cadeiras, mesas e demais elementos necesarios para realizar distintas actividades.
As ventás estarán dotadas de contras para poder escurecer as salas para proxeccións e contará con cafetería. Asemade, o mural de González Collado deixará de ser fondo de barra para quedar exposto e dotalo de protagonismo. Para que o local cumpra coa evacuación no caso de incendios, créase unha nova saída no fondo do local cara a rúa Mugardos.
Con esta actuación, o Concello de Ferrol porá disposición da veciñanza de Recimil dun novo equipamento social que permitirá dinamizar o barrio.
Esta importante licitación para converter o antigo Bambú nun equipamento social para o barrio súmase outras nestes últimos días. Neste senso, o Concello de Ferrol licitou a reurbanización da fase 1 da rúa Rubalcava, por 1,5 millóns de euros; a cuberta do parque infantil do Inferniño, cun orzamento de 270.0000 euros; e melloras nos pavillóns dos CEIPs públicos da cidade, polo importe dun millón de euros. En total, estas catro obras suman máis de 3,2 millóns de euros de investimento nos barrios.
