O Concello de Ferrol rematou os traballos de demolición dos antigos aseos da praza do Inferniño. Esta intervención permite completar o novo parque infantil cuberto, coa creación dunha zona axardinada, mellorando así a integración e a calidade ambiental do espazo.
O novo espazo de lecer infantil conta con novos xogos de escalada e tobogáns, así como cun valado perimetral para garantir a seguridade dos usuarios. Ademais, instalouse unha rede de drenaxe superficial para a recollida das pluviais e dotouse dunha nova instalación de iluminación pública tipo led, que mellora a eficiencia enerxética e a visibilidade do recinto.
Este equipamento convértese no primeiro parque infantil cuberto de Ferrol. Dispón dunha cuberta a catro augas duns 360 metros cadrados con estrutura de aceiro e cuberta con policarbonato para cubrir a área de xogos infantís. Entre outras características, os panos de cuberta teñen a súa parte máis baixa en torno aos 4,6 metros de altura e a máis alta chega aos 5,6 metros.
A través deste proxecto, o Concello de Ferrol aposta pola recuperación dun espazo público, transformándoo nun punto de encontro útil e accesible durante todo o ano.
