O Concello de Ferrol reorganiza as áreas de estatística e rexistro para mellorar a calidade do servizo á cidadanía. Así o explicou o concelleiro de Organización Interna, Javier Díaz Mosquera. Ademais, a administración local busca optimizar os recursos humanos. “Estamos a levar a cabo unha reorganización, que xa comezou hai un ano coa aprobación do regulamento municipal, que nos levou a ser gran cidade”, salientou Díaz. Todos estes cambios foron tratados co persoal afectado para coñecer con antelación a nova situación do seu posto.
Así, cando un cidadán entre pola porta de rexistro, dende rúa María, atoparase co rexistro municipal e con estatística. Así mesmo, encontrará o caixeiro con indicacións para levarse no momento unha copia do padrón ou do certificado de convivencia. A maiores, a oficina de obxectos perdidos tamén está nesta zona, a continuación do rexistro.
No tocante ás dependencias antes ocupadas por estatística, agora trasladarase Medio Ambiente, antes situada na segunda planta; xunto ao despacho do concelleiro da área, José Tomé. “Así conseguimos que na planta baixa estean Medio Ambiente, Obras e Cemiterios, todas as áreas relacionadas entre si e dependentes do mesmo edil”.
Na segunda planta, onde antes estaba Medio Ambiente, agora instalarase a oficina de Fondos Europeos, que estará operativa en vindeiras datas.
“O obxectivo en todo momento é mellorar a atención á cidadanía, menos esperas, reducir a burocratización administrativa e traballar para ter unha administración máis áxil e moderna”, concluíu o concelleiro de Organización Interna.
