A oficina da rúa Venezuela 1 acolleu unha reunión de coordinación e seguimento das obras de humanización da avenida das Pías FE-14. A ela asistiron o alcalde de Ferrol, José Manuel Rey Varela; a subdelegada do Goberno na Coruña, María Rivas; técnicos da Demarcación de Estradas do Estado en Galicia do Ministerio de Transportes e Mobilidade Sostenible, representantes da Xunta de Galicia, Navantia e as empresas adxudicatarias.
O obxectivo da reunión era consensuar a apertura secuencial das obras ao tránsito peonil e rodado, que se fará por treitos en dúas fases. Así, proximamente procederase á apertura ao tráfico peonil e vehicular da FE-14 desde o inicio da actuación en Porta Nova ata a nova glorieta na intersección coa estrada da Trinchera FE-11. Non obstante, permanecerán cerradas ao tráfico a avenida Marqués de Santa Cruz e a avenida Salvador Allende Gossens.
Na segunda fase, segundo avanzou a Subdelegación do Goberno, preténdese abrir antes de Semana Santa o eixo formado pola avenida Marqués de Santa Cruz e a avenida Salvador Allende Gossens, así como a nova glorieta executada na intersección de estas vías coa FE-14, prolongándose a apertura ao tráfico peonil e vehicular da FE-14 ata esta glorieta. Así, quedará pechado ao tráfico só o tramo final da FE-14, ata o enlace das Pías.
“Parécenos un paso moi necesario, xa que a Semana Santa é moi importante para a cidade e mantemos marcado o 11 de abril para a apertura ata Marqués de Santa Cruz de toda a infraestrutura”, finalizou o rexedor ferrolán.
CORRECCIÓN DE INCIDENCIAS NAS OBRAS DAS PÍAS
Tras o encontro, o alcalde ferrolán afirmou que “estas reunións serven para fomentar a participación das administracións e dos veciños”, xa que “é unha transformación moi importante para os barrios de Ultramar, Caranza, Esteiro, San Xoán Bertón”. Grazas a esta comisión, pódense analizar de xeito conxunto as incidencias detectadas e as trasladadas pola veciñanza.
Entre as incidencias falouse da situación da rúa Santa Comba e do edificio do Diapasón. “Quedamos en ter unha reunión técnica coa empresa municipal de augas e a dirección da obra para constatar que non se vai producir ningún tipo de inundación dos garaxes nin dos portais”, explicou o rexedor. Neste sentido, asegurou que hai un compromiso total por parte da dirección de obras, da Demarcación e da empresa municipal de aguas para abordar calquera modificación necesaria.
Outra das peticións que se tratou foi a relacionada coas prazas de aparcamento que non existían no proxecto orixinal. “Cremos que é fundamental en procesos de humanización facer compatible ter máis zonas verdes, máis espazos de peóns e máis prazas de aparcamento”, insistiu o alcalde.
As obras da avenida das Pías supón un investimento de 11 millóns de euros, financiado cos fondos europeos NextGenerationEU do Plan de Recuperación, Transformación e Resiliencia. O proxecto contempla actuar en case dous quilómetros da FE-14, buscando a integración urbana e fomentar a mobilidade activa e sostible. Na actualidade traballa nestas obras un equipo de 54 persoas e 12 unidades de maquinaria para rematalas o menor prazo posible.