O presidente provincial, Luis Menor, visitou o Concello de Leiro para comprobar diferentes obras e actuacións realizadas ao abeiro do Plan de Cooperación da Deputación de Ourense. Fíxoo acompañado de membros da Corporación liderados polo alcalde, Francisco José Fernández. Alí, Menor sinalou que o Concello de Leiro percibirá máis de 700.000 euros durante este mandato provincial a través do Plan CooperOU que, complementados con outras axudas, “terá obras por máis dun millón de euros”.
As obras contempladas no Plan de CooperOU son fundamentalmente de humanización e mellora dos servizos municipais, complementadas co plan global que está a desenvolver o Concello de Leiro, polo cal Menor felicitou ao rexedor. De feito, o presidente provincial visitou a obra de pavimentación e humanización do tramo final da rúa Casanova, na que se investiron 48.000 euros. Así mesmo, comprobaron o resultado da pavimentación do acceso ao tanatorio, que supuo o investimento de 30.000 euros. Ambas intervencións foron realizadas grazas aos fondos do Plan de Cooperación.
A comitiva tamén comprobou o avance das obras de mellora que está a realizar a Deputación na estrada provincial OU-0306. A intervención nesta vía, que conecta Leiro con San Cristovo, supón o investimento de 120.000 euros. A maiores, o presidente provincial explicou que se vai continuar con novas fases para mellorar a súa conectividade. Nesta liña, o rexedor recalcou que o arranxo desta vía está a ser fundamental para mellorar a conexión do municipio de Leiro con Avión, Beariz e O Carballiño.
