O director da Axencia Galega da Industria Forestal, Jacobo Aboal, salientou o proxecto de recuperación de soutos e castiñeiros do Concello de Nogueira de Ramuín. Segundo indicou, axudará a manter o sistema agroforestal do interior de Galicia.
Aboal participou na presentación do proxecto “Transformación bioeconómica forestal en Nogueira de Ramuín mediante a recuperación do bosque avellentado para o seu axeitado aproveitamento”. Alí destacou a dilatada experiencia do Centro de Investigación Forestal (CIF) de Lourizán na caracterización molecular de variedades de castiñeiro. Esta entidade participará na iniciativa, identificando as variedades de castaña que existen e determinando cales son as máis axeitadas para a súa recuperación e aproveitamento.
Durante a súa intervención, o director apuntou que o proxecto axudará a conservar o patrimonio natural e poñelo a disposición da cidadanía, rescatar o patrimonio xenético dos soutos e castiñeiros e garantir que as futuras plantacións sexan resistentes e sustentables.
Finalmente, Jacobo Aboal sinalou que os resultados contribuirán a un uso sostible dos recursos xenéticos forestais, o desenvolvemento económico de Nogueira de Ramuín e da súa área e un maior emprego verde.
