O CEIP Sigüeiro conta desde hoxe cun novo coidador, reforzo que permitirá mellorar a atención educativa e asistencial do alumnado. A incorporación deste profesional prodúcese a raíz dunha necesidade trasladada pola ANPA A Nosa Escola e pola Dirección do centro, que nas últimas semanas mantiveron diversas xestións e reunións co Concello de Oroso para dar resposta a esta demanda crecente.
O alcalde de Oroso, Alex Doval, e a concelleira de Ensino, María Requejo, apoiaron desde o primeiro momento esta solicitude, impulsando as xestións necesarias para que o reforzo estivese dispoñible no menor tempo posible. Deste modo, o novo coidador comeza xa a prestar servizo, contribuíndo a mellorar o funcionamento diario do CEIP Sigüeiro e a atención dos nenos e nenas que máis o precisan.
O Concello de Oroso destaca que esta medida “reflicte o compromiso firme coa educación pública e coa atención ás necesidades reais dos centros”, subliñando a importancia de manter unha comunicación constante coa comunidade educativa para seguir mellorando os servizos municipais.
