A afiliación do PP de Ramirás acordaron por unanimidade constituír unha xestora local á cuxa fronte estará Manuel Alejandro Domínguez. Así, substitúe ao ata de agora presidente da agrupación local, Juan Carlos Rodríguez Matías.
O presidente provincial, Luís Menor, acudiu á reunión da militancia. Valorou positivamente que a decisión de crear unha xestora se adoptara por unanimidade, “o que pon de manifesto a unidade que existe no PP de Ramirás”.
Menor puxo deberes á nova dirección popular neste concello. Neste sentido, subliñou que o obxectivo fundamental é “relanzar e ampliar o partido para recuperar o goberno municipal e as tradicionais maiorías obtidas noutras convocatorias electorais”.
O líder dos populares ourensáns tivo palabras de agradecemento para Rodríguez Matías por todo o traballo realizado nestes máis de vinte anos na política municipal. Durante este tempo durante foi alcalde en minoría no mandato 2015-2019, “sendo quen de demostrar capacidade de diálogo e pacto para garantir os mellores servizos á veciñanza”.
Luís Menor lembrou que os resultados electorais en 2023 deixaron un complexo escenario no concello; tres edís para PP, socialistas e nacionalistas. Asemade, recordou o incumprimento por parte da alcaldesa socialista do pacto, polo que debería ter cedido ao portavoz popular o bastón de mando en Ramirás en xuño de 2025.
O acordo de creación da xestora e da proposta para a súa presidencia terá que ser ratificada na próxima Xunta Directiva que convoque o Partido Popular de Ourense. Esta xestora fai a número 14 das creadas ata o momento en toda a provincia, que xunto coa vintena de congresos locais celebrados fai que case a metade das agrupacións locais do PP na provincia estean actualizadas ou en proceso de renovación.
