O Concello de Ortigueira, no marco do proxecto “Escola de Familias”, organiza un taller sobre xestión emocional e resolución de conflitos.
Esta actividade, segunda sesión da Escola de Familias, pretende apoiar ás familias no seu día a día. Así, ensinará ferramentas para mellorar a comunicación, manexar as emocións e resolver desacordos dun xeito positivo.
O taller desenvolverase o 21 de maio, de 17.00 a 19:00 h, no antigo hospital de San Roque. Estará impartido por Rocío Álvarez, especialista en formación, asesoría educativa e terapeuta.
Esta iniciativa forma parte do compromiso de Escola de Familias do Concello de Ortigueira. O obxectivo é acompañar e reforzar o papel das nais, pais e persoas coidadoras como axentes clave na educación e benestar dos nenos e nenas. Así mesmo, trátase dun impulso á formación e o apoio mutuo.
A actividade é de balde e está aberta a todas as familias de Ortigueira. Para participar, será necesario inscribirse previamente chamando ao teléfono 981 400 000. As prazas son limitadas e outorgaranse por orde de inscrición.
ESCOLA DE FAMILIAS DE ORTIGUEIRA
O proxecto Escola de familias xorde co obxectivo de fortalecer as relacións familiares, mellorar o vínculo afectivo e dotar ás familias de estratexias en materia de educación, disciplina positiva, establecemento de límites e normas no fogar.
Así mesmo, abórdanse temas de especial relevancia, como a prevención de condutas de risco, o acoso escolar, as adiccións e os trastornos emocionais na infancia e adolescencia. A maiores, búscase potenciar o traballo conxunto entre familias e centros educativos, garantindo que a formación que se imparte nos colexios e institutos chegue tamén aos fogares.
