A Deputación de Ourense pon en marcha en novembro o programa “Ourense Reto Rural Dixital” , orientado á capacitación dixital de 6.000 persoas do ámbito rural da provincia.
O programa “Ourense Reto Rural Dixital” ten como obxectivo o desenvolvemento de programas formativos orientados fundamentalmente a persoas maiores, mulleres, infancia e xuventude e persoas desempregadas. Toda a información está en https://retodigital.depourense.gal/.
Esta iniciativa conta xa coa adhesión de 67 municipios da provincia onde desenrolar o programa. Asemade, adheríronse 17 asociacións de interese social no eido de prestar servizos a cidadanía. A Deputación segue en contacto cos 25 concellos que aínda non asinaron a adhesión co obxecto de integralos no programa de forma inminente.
A institución provincial é a entidade beneficiaria da axuda do programa nacional “Reto Rural Digital”, para proxectos de capacitación dixital no medio rural, no marco do Plan de Recuperación, Transformación y Resiliencia, financiado pola Unión Europea-Next Generation EU.
Os programas de formación estarán enfocados á adquisición de competencias dixitais básicas. O obxectivo é que as persoas participantes poidan operar con confianza e seguridade para comunicarse, informarse ou realizar transaccións, relacionarse e interactuar coas administracións públicas, e resolver problemas sinxelos da contorna dixital. Serán accións formativas totalmente gratuítas para o alumnado, de 7,5 horas lectivas en diferentes modalidades, en liña e presenciais.
A presentación oficial do programa terá lugar o vindeiro xoves, 6 de novembro de 2025, ás 10:00 horas no Salón de Actos do Centro Cultural Marcos Valcárcel.
